တနေ့တာလုံး ပင်ပင်ပန်းပန်း အလုပ်လုပ်နေရပြီး ညဘက်အနားယူ အိပ်စက်ချိန်မှာ ကောင်းကောင်း အိပ်မပျော်နိုင် ဖြစ်ခဲ့မယ်ဆိုရင် ကိုယ့်ရဲ့ တစ်နေ့တာ အချိန်တွေမှာ တက်ကြွလန်းဆန်း နေရမယ့်အစား ငိုက်မျဉ်းနေတာ၊ နုံးနေတာ၊ စိတ်တိုနေတာ၊ ဆုံးဖြတ်ချက် ပိုင်ပိုင်နိုင်နိုင် မချနိုင်တာ၊ စိတ်ကျတာတွေ ဖြစ်တတ်ပါတယ်။
ပျမ်းမျှအားဖြင့်တော့ လူတစ်ယောက်အတွက် လုံလုံလောက်လောက် အိပ်ချိန်ကို ၈နာရီခွဲမှ ၉နာရီခွဲလို့ သတ်မှတ်လေ့ရှိပါတယ်။
ဒါပေမယ့် သင်ဟာ
ညဘက်မှာ ခဏခဏ နိုးနေမယ်ဆိုရင်
မနက် အစောကြီး အချိန်မဟုတ် အခါမဟုတ် နိုးနေမယ်ဆိုရင်
လုံလောက်တဲ့အိပ်ချိန်နဲ့အိပ်ပေမယ့် အိပ်ရာနိုးရင် လန်းဆန်းမနေဘူးဆိုရင်
သင် နှစ်နှစ်ခြိုက်ခြိုက် အိပ်မပျော်ဘူးလို့ ပြောလို့ရနိုင်ပါပြီ...။
တချို့ နှစ်နှစ်ခြိုက်ခြိုက် အိပ်မပျော်ခြင်း တွေကတော ရောဂါတစ်ချို့ဖြစ်တဲ့ ကင်ဆာ၊ ပန်းနာရင်ကျပ်၊ အဆစ်ရောင်ရောဂါ၊ အချို့သောဆေးများ၊ စိတ်ကျရောဂါ အပါအ၀င် အခြားသော စိတ်ကျန်းမာရေးဆိုင်ရာ ပြဿနာများ၊ အဲဒါတွေ အပြင် ပတ်ဝန်းကျင်ရဲ့ အလင်းအမှောင်၊ အသံတွေနဲ့ ဆက်စပ်မှုရှိပါတယ်။ တခါ တလေတော့လည်း အဲဒါတွေနဲ့ ဘာမှမဆိုင်ဘဲ သူ့ဟာသူ အိပ်မပျော်တာလည်း ရှိနေတတ်ပါတယ်။
အိပ်မပျော်ဘူးလို့ ဆိုရာမှာလည်း
(၁) တစ်ည၊ နှစ်ည ဒါမှမဟုတ် ရက်သတ္တပတ် အနည်းငယ်သာ အိပ်မပျော်တာ
(၂) တစ်ချို့ရက်တွေမှာ အိပ်ပျော်လိုက်၊ တစ်ချို့ရက်တွေမှာ အိပ်မပျော်လိုက်ဖြစ်တာ
(၃) အိပ်မပျော်မှုဟာ တစ်ပတ်မှာ သုံးရက်နှင့်အထက် ရှိပြီးနောက် တစ်လထက် ပိုကြာနေတာ ရယ်ဆိုလို့ ဆိုပြီးရှိပါတယ်။
သင့်မှာ တကယ်သာ နှစ်နှစ်ခြိုက်ခြိုက် အိပ်မပျော်ဘူးလို့ ခံစားနေရရင် ဒါမှမဟုတ် သင့်ရဲ့ တစ်နေ့တာ လုပ်ငန်းတွေကို အနှောင့်အယှက် ဖြစ်လာစေမယ်ဆိုရင် သင့်ရဲ့ အိပ်ချိန်နဲ့ အိပ်တဲ့ပုံစံကို လေ့လာကြည့်ပေးပါ။
ခဏတဖြုတ်ပဲ ဖြစ်တဲ့ ကိစ္စဆိုရင် သူ့ဖာသာသူ ကောင်းသွားမှာပါ။ အိပ်မပျော်နိုင်တဲ့ရက်တွေ များလာရင်တော့ ဒီအချက် ကလေးတွေ လုပ်ပေးဖို့ လိုပါလိမ့်မယ်။
(၁) ရှေ့မှာဖော်ပြခဲ့ပြီးတဲ့ အတိုင်း အိပ်မပျော်နိုင်တဲ့ရောဂါ ရှိမရှိ အရင်ရှာပေးပါ။
(၂) ညဘက်မှာ အရက်သောက်ခြင်းဟာ နှစ်ခြိုက်စွာ အိပ်ပျော်မှုကို အနှောင့်အယှက် ဖြစ်စေပါတယ်၊ ဒါမှမဟုတ် ပိုဆိုးစေပါတယ်။ ဒါကြောင့် လျှော့သောက်ပါ။
(၃) အိပ်ဆေးတချို့ကို အခါအားလျော်စွာ သုံးနိုင်ပါတယ်။ ဒါပေမယ့် ဒီဆေးတွေကလည်း ရေရှည်မှာ ဆိုးကျိုးတွေ ဖြစ်စေနိုင်တာမို့ ဆင်ခြင်ရပါလိမ့်မယ်။
နှစ်ခြိုက်စွာ အိပ်ပျော်နိုင်ဖို့ ဒီနည်းလေးသုံးနည်း ထဲက တစ်နည်း ဒါမှမဟုတ် ကြိုက်သလို သုံးနိုင်ပါတယ်။ အဲဒါကတော့
(၁)စိတ်ဖိစီးမှုကို လျှော့ချပေးတဲ့ နည်းပါ။ စိတ်ရော လူရော အနားယူပြီးမှ အိပ်စက်ရင် သင် နှစ်နှစ်ခြိုက်ခြိုက် အိပ်ပျော်မှာပါ။
(၂)အိပ်ချိန်တွေကို လျှော့ချပေးပါ။ တချို့လူတွေက အိပ်ပျော်ဖို့ အချိန်အများကြီး ယူရတာမျိုး ဖြစ်တတ်ပါတယ်။ နှစ်ခြိုက်စွာ အိပ်ပျော်နိုင်အောင် အိပ်ရာထဲမှာနေတဲ့ အချိန်တွေကို လျှော့ချပေးလိုက်ပါ။ နောက်ကျမှအိပ်ပြီး စောစောထပေးပါ။ တဖြည်းဖြည်းနဲ့မှ အရင်လို ပြန်ကျင့်ယူပါ။
(၃)သင့်အိပ်ရာကလေးကို အိပ်ဖို့ကလွဲပြီး တခြားအပိုကိစ္စတွေ မသုံးမိစေဖို့ ဂရုစိုက်ပါ။ (စာဖတ်တာ၊ တီဗွီကြည့်တာမျိုးတွေပေါ့)
ဒါဆို နှစ်နှစ်ခြိုက်ခြိုက် အိပ်ပျော်အောင် ဘာလုပ်သင့်သလဲ၊
(၁)အိပ်ချိန်ကို သတ်မှတ်ပေးလိုက်ပါ။ အချိန်မှန် အိပ်ရာဝင်ပြီး အချိန်မှန်မှန် အိပ်ရာထပါ။ ညနေ ၃ နာရီကျော်ရင် တရေးတမော မအိပ်ပါနဲ့တော့။
(၂)ညနေစောင်း ဒါမှမဟုတ် ညမှာ caffine ပါတဲ့ အစားအစာတွေဖြစ်တဲ့ coffee, cola, chocolate အများအပြား စားသောက်တာ၊ Alcohol ပါတဲ့ အရက်၊ ဘီယာ သောက်စားတာ၊ Nicotine ပါတဲ့ ပစ္စည်းဖြစ်တဲ့ ဆေးလိပ်သောက်တာမျိုးများကို ရှောင်ပါ။ (တကယ်လို့ မဖြစ်မနေ သောက်စားရမယ်ဆိုရင် လည်း အိပ်ချိန်နဲ့ ၂နာရီ ၃နာရီ ကွာပါစေ)
(၃)ပုံမှန်လေ့ကျင်ခန်းလုပ်ပေးပါ။ လေ့ကျင့်ခန်းလုပ်တဲ့ အချိန်ဟာ အိပ်ချိန်နဲ့ အရမ်းနီးနေရင် သင့်ကိုယ်မှာရှိနေတဲ့ အကျောဆိုင်တွေ မပြေလျော့နိုင်သေးတာမို့ အိပ်ချိန်နဲ့ ၅ နာရီ၊ ၆ နာရီလောက် ကွာပေးရပါမယ်။
(၄)ညစာကိုလည်း အိပ်ချိန်နဲ့ ၂ နာရီ၊ ၃ နာရီ ခွာပြီး စားပေးပါ။ အစာအိမ်ထဲက အစာတွေ အူထဲရောက်သွားဖို့က ၂-၄ နာရီ ပျမ်းမျှ ကြာပါတယ်။ သင်အိပ်တဲ့အချိန်မှာ အစာအိမ်ထဲမှာ အစာရှိနေရင် ကောင်းကောင်း အိပ်ပျော်မှာ မဟုတ်ပါဘူး။
(၅)သင့်အိပ်ခန်းကလေးကို တိတ်တိတ်ဆိတ်ဆိတ်၊ ငြိမ်းငြိမ်းချမ်းချမ်းနဲ့ အလင်းရောင် သိပ်မများအောင် လုပ်ထားပေးပါ။ အတွင်းနံရံဆေးသား၊ အိပ်ရာခင်းတွေ၊ မီးလုံးကအစ စိတ်ကို ပျော့ပြောင်းစေမယ့် အပြာရောင်၊ ပန်းရောင်ဖျော့ဖျော့လေးများ ဖြစ်သင့်ပါတယ်။ လေ၀င်လေထွက် ကောင်းဖို့တော့ လိုပါတယ်။ တကယ်လို့ သင်ဟာ တခြားသူတွေနဲ့ တစ်ခန်းတည်း အိပ်ရတယ်ဆိုရင် အလင်းရောင်ကို ကာကွယ်ဖို့ အိပ်တဲ့အချိန်မှာတပ်တဲ့ မျက်လုံးကိုဖုံးတဲ့ဟာလေး တပ်ထားပါ။ အသံတွေကို ကာကွယ်ဖို့ အမြဲကြားနေရမယ့် အသံတစ်ခုခုကို သင်ဘာသာသင် ဖန်တီးလိုက်ပါ။ (ဥပမာ ပန်ကာသံ) အဲဒီအသံက တခြားအသံတွေကို ဖုံးလွှမ်းသွားရင် သင် အိပ်ပျော်ပါလိမ့်မယ်။
(၆)စိတ်အပန်းဖြေဖို့ အိပ်ရာဝင်ခါနီးမှာ စာအုပ်ဖတ်ခြင်း၊ သီချင်းနားထောင်ခြင်း၊ ရေချိုးခြင်းများ ပြုလုပ်ပေးပါ။ (အင်တာနက်သုံးဖို့တော့ မတိုက်တွန်းချင်ပါဘူး)
(၇)အိပ်ရာထဲမှာ လဲလျောင်းနေတာ မိနစ် ၂၀ ကျော်ကြာတဲ့အထိ အိပ်မပျော်နိုင်သေးဘူး၊ မငိုက်သေးဘူးဆိုရင် ဆက်ပြီး ကြိုးစားမနေပါနဲ့။ အိပ်ရာထဲမှထပြီး စိတ်သိပ်မပင်ပန်းစေမယ့် သက်တောင့်သက်သာ အလုပ်ကလေးကို ငိုက်လာတဲ့အထိ လုပ်နေပေးပါ။ (စာဖတ်တာမျိုးပေါ့) ပြီးမှ အိပ်ရာပြန်ဝင်ပါ။
(၈)မနက်ဖြန်မှာ လုပ်စရာတွေအတွက် စိတ်ပူနေမယ်ဆိုရင် သင်အိပ်ရာမ၀င်ခင် ကိစ္စလေးတွေကို ရေးချထားလိုက်ပါ။
(၉)သင့်အိပ်ရာကလေးကို အိပ်ဖို့အတွက်ပဲ အဲ..အိပ်ဖို့အတွက်ပဲ သုံးပါ။
ဒီလို အလေ့အကျင်ကလေးတွေ သုံးပြီးကာမှ သင်ဟာ နှစ်နှစ်ခြိုက်ခြိုက် အိပ်မပျော်နိုင်သေးရင်တော့ သင့်ရဲ့မိသားစုဆရာဝန်နဲ့ တိုင်ပင်သင့်ပါပြီလို့ထင်ပါတယ်...။
မွန်းသက်ပန် (ဆေး-၁)
No comments:
Post a Comment